អន្តរជាតិ៖ ប្រទេសអូស្ត្រាលីគ្រោងបើកព្រំដែនអន្តរជាតិឡើងវិញចាប់ពីថ្ងៃទី១ ខែវិច្ឆិកា ឆ្នាំ២០២១ តទៅនិងតម្រូវឱ្យអ្នកដំណើរដែលចូលអូស្ត្រាលីទាំងអស់បង្ហាញនូវប័ណ្ណវ៉ាក់សាំងផងដែរ។

វិញ្ញាបនបត្រចាក់វ៉ាក់សាំងទាំងនោះត្រូវចេញដោយអាជ្ញាធរមានសមត្ថកិច្ច ឬភ្នាក់ងារដែលមានការទទួលស្គាល់ពីប្រទេសនោះដោយធ្វើជាភាសាអង់គ្លេស ឬអមដោយលិខិតបកប្រែភាសាអង់គ្លេសមានការបញ្ជាក់ត្រឹមត្រូវ។ ចំពោះខ្លឹមសារនៃវិញ្ញាបនបត្របញ្ជាក់ត្រូវបង្ហាញនូវឈ្មោះ ថ្ងៃខែឆ្នាំកំណើត ឬលេខប៉ាស្ព័រ ប្រភេទវ៉ាក់សាំងដែលបានចាក់ជាមួយនឹងថ្ងៃចាក់វ៉ាក់សាំងផងដែរ។

ស្ថានឯកអគ្គរាជទូតកម្ពុជាប្រចាំអូស្ត្រាលីបានឱ្យដឹងថា អ្នកដំណើរចូលអូស្រា្ដលីអាចយកតាមខ្លួននូវវិញ្ញាបនបត្រដែលជាក្រដាស ឬជាប្រភេទឌីជីថលក៏បាន។ ស្ថានទូតក៏បានបញ្ជាក់ដែរថា បច្ចុប្បន្នប្រទេសអូស្រ្តាលីទទូលស្គាល់លើវ៉ាក់សាំងចំនួន៥ ដែលមានដូចជា AstraZenaca, Pfizer, Moderna, Sinovac និង Janssen-Cilag។

បើតាមស្ថានឯកអគ្គរាជទូតកម្ពុជាប្រចាំអូស្ត្រាលី ចំពោះវ៉ាក់សាំងដែលពុំមានឈ្មោះខាងលើរដ្ឋាភិបាលអូស្ត្រាលីកំពុងពិចារណា និងជូនដំណឹងពីការសម្រេចនៅពេលក្រោយ៕